USD
КӨКШЕТАУ. 31 қаңтар. Ақмола облысының полицейлері кезінде адамдарды автоматпен атып өлтірген қарақшыны қолға түсірді. Бұл туралы Bugin.kz ақпарына сүйенген rast.kz хабарлайды.
«90-жылдардағы қылмыстық топтың соңғы мүшесі 26 жылдан соң ұсталды», – делінген хабарламада.
Қылмыстық топтың қарақшылары жүргізушілерді тонаумен айналысқан, оның барысында 4 кісіні атып өлтірген. Оларға сондай-ақ экономикалық контрабандамен шұғылдану, билік өкілінің немесе шенеуніктің атағын беру фактілері бойынша айып тағылған.
Банды бұл қылмыстарды бұдан 26 жыл бұрын, яғни 1998 жылы жасаған.
Полицей киімін киіп, автоматпен қаруланып алған қылмыскерлер ұлан жолдың бойында көлік тоқтататын болған. Тоқтаған көліктің жүргізушісі мен жолаушыларын атып, мәйіттерді орманға жасырған. Кісі өлтірумен және қарақшылықпен егеленіп кеткен сол көліктерін бөлшектеп, Ресей жаққа сатып отырған.
Massaget.kz порталының жазуынша, 90-жылдары Ақмола облысында елді қан қақсатқан бұл қарақшылар тобы «Нагоев бандасы» деп аталған. Ол 10 адамнан құралған. 1999 жылы қарақшылардың 9-ы қамауға алынған. Сотта олардың екеуі өлім жазасына кесілсе, қалғандары ұзақ мерзімге бас бостандықтарынан айырылған. Тек осы жігіт қана ұстатпай кеткен. Ол ізін білдіртпеу үшін сақал қойып алған, тіпті аты-жөні мен туған күніне дейін өзгертіп жіберген. Сөйтіп, ширек ғасыр уақыт емін-еркін, беймалал жүрген. Содан бері үш бала тәрбиелеп өсірген. Енді жасы 55-ке келгенде ақыры қолға түсті. Ол Көкшетау қаласында құрықталды.
Қазір тергеу жұмыстары жүргізіліп жатыр.
