USD
БУЭНОС-АЙРЕС. 17 қаңтар. Аргентиналық атақты футболшы Диего Марадонаның ұлы Диего Марадона әкесінің кісі қолынан ажал тапқанын жария етті. Бұл туралы gazeta.ru дерегіне сүйенген rast.kz хабарлайды.
«Біз Аргентина сот төрелігіне сенеміз. Біреулер менің әкемді өлтірді. Мұны кім істегенін менің айтуымның керегі жоқ. Бұған қатысты менің өз байламдарым бар, бірақ оларды айта алмаймын», – деді кіші Диего Марадона.
Еске сала кетейік, футболшы Диего Марадона 2020 жылы 25 қарашада 60 жасында бақилық болды.
Аяқ доп шебері 1984 жылдан 1991 жылға дейін Италияның Неаполь қаласының «Наполи» командасында ойнап, екі мәрте ел чемпионы атанды. Ол сондай-ақ Аргентинаның «Архентинос Хуниорс», «Бока Хуниорс», «Ньюэллс Олд Бойз», испанның «Барселона» және «Севилья» клубтары сапында да өнер көрсетті. Ал 2010 әлем чемпионатында бас жаттықтырушы ретінде Аргентина құрамасын ширек финалға дейін жеткізді.
Марадона Аргентина құрамасы құрамында 91 матч өткізіп, 34 гол соқты. 1986 жылғы әлем чемпионатының қорытындысында турнирдің ең үздік футболшысы атанды. Келесі, 1990 жылғы чемпионатта командаластарымен бірге мундиалдың күміс медаліне қол жеткізді.
