АҚШ Британияның соңын ала Украинаның қауіпсіздігіне кепіл болмақшы
КИЕВ. 13 қаңтар. Құрама Штаттар Ұлыбританияның бастамасын қайталап, Украинаның қауіпсіздігіне кепіл болуға шешім қабылдауы мүмкін. Бұл туралы The Moscow News ақпарына сүйенген rast.kz хабарлайды.
АҚШ-тың Украинадағы елшісі Бриджит Бринк Украинамен қауіпсіздік жөніндегі міндеттеме мәселесі бойынша екі раундтық келіссөз жүргізілгенін баяндады. Ол жұма күні журналистерге Ұлыбританияның Украинамен жасасқан қауіпсіздік туралы екі жақты келісімнің мәніне түсіндірме берді.
Елшінің айтуынша, мұндай стратегиялық міндет қазір АҚШ президентінің алдында да тұр.
Бринк келешек келісімнің нақты параметрлерін немесе мерзімдерін айта қойған жоқ. Ол тек келіссөздің әлі жүріп жатқанын ғана сөз етті. Сонымен бірге елші АҚШ Украинаның НАТО-ға кіргенін қолдайтынын, ал қауіпсіздік жөніндегі келісімнің Киев альянсқа мүше болғанға дейінгі «қауіпсіздікті қамтамасыз етудің көпірі» болып табылатынын атап өтті.
Еске сала кетейік, 12 қаңтар күні Украина президенті Володимир Зеленьский Киевке іссапармен келген Ұлыбритания премьер-министрі Риши Сунакпен он жылдық мерзімге әскери әріптестікті қарастыратын қауіпсіздік жайлы екі жақты келісімге қол қойған болатын. Осы келісімнің аясында Ұлыбритания Украинаға Ресей тарапынан ықтимал агрессия болған жағдайда «тез және ұзақ мерзім» қолдау көрсететін болады.
Кездесу барысында Сунак Ұлыбританияның бұл кезге дейін Украинаға ұшатын қарулар мен әскери техникалар беріп үлгергенін еске салды. Лондон биылғы жылы Киевке әскери көмек ретінде 2,5 млрд ($3,2 млрд) фунт стерлинг бөліп отыр, ол бұған дейінгі жылдардан 200 млн фунтқа ($256 млн) көп.
Жасасын Ұлыбритания!
