Қазақ тілін қорлаған қызға қатысты қылмыстық іс қозғалып жатыр
АЛМАТЫ. 22 қазан. Қазақ тілін «мәмбеттің тілі» деп қорлаған алматылық қазақ қызының үстінен араздықты қоздырды деген бап бойынша қылмыстық жауапқа тартылады. Бұл туралы ҚазТАГ ақпарына сүйенген rast.kz хабарлайды.
«Аталмыш деректің негізінде ҚР Қылмыстық кодексінің 174-бабы (әлеуметтiк, ұлттық, рулық, нәсiлдiк, тектік-топтық немесе дiни алауыздықты қоздыру) бойынша сот алды тексеру жүріп жатыр. ҚР заңнамасына сәйкес тиісті шаралар қабылданатын болады», – деп баяндады Алматы полиция департаментінің баспасөз қызметі.
Бұдан бұрын интернетте бір қазақ қызының қазақ тілінің «мәмбеттердің тілі» деп атап алып, өзінің бұл тілді жек көретінін, ал Алматы қаласына ауылдан келгендердің қаптап кеткенін, мұны да қаламайтынын айтып отырғаны түсірілген видео тараған еді. Жұрт ессіздіктен есіріп отырған қыздың бұл әрекетін қатты сынға алып, қатты ашу-ыза танытты.
