Қырымдағы Чонгар көпіріне ракетамен соққы жасалды: қозғалыс тоқтады
КИЕВ. 29 шілде. Storm Shadow тағы Чонгар көпіріне ұшып келді, оккупанттар оны атып түсірдік дейді, бірақ өткелге ешкімді жіберіп жатқан жоқ. Бұл туралы «Диалог.UA» дерегіне сүйенген rast.kz хабарлайды.
Алдын ала мәлімет бойынша, шілденің 29-ы күні таңертең ертемен РФ оккупанттары басып алған Қырымның әкімшілік шекарасындағы Чонгар көпіріне тағы да ракетадан соққы берілді. Оқиға шамамен сағат 5-тің кезінде болған.
Оны көргендер әлеуметтік желіде жазып жатыр. Оккупанттар сондай соққының болғанын ресми түрде мойындады.
Херсон жерінің гауляйтері етіп Кремль тағайындаған Владимир Сальдо Ресей әуе қорғанысы күштерінің Чонгар ауданындағы темір жолдың үстінен Storm Shadow ракетасы атып түсірілгенін баяндады. Сонда да болса, олай қарай ешкім жіберіліп жатқан жоқ.
Украин тарапы әзірген оқиғаға байланысты түсіндірме бермей отыр.
Айта кетуіміз керек, Чонгар көпірі бұдан бір ай бұрын бір рет – 24 маусым күні түнде ракетамен атқыланған болатын. Осылайша ресейліктер өзінің Оңтүстік майданда соғысып жатқан оккупациялық тобын қару-жарақпен, оқ-дәрімен қамтамасыз етуге белсене пайдаланып тұрған жол істен шыққан еді.
Тағы бір ескеретін жайт, Чонгар көпірінен Украина Қарулы күштері бақылауда ұстап отырған жерге дейінгі ара қашықтық шамамен 130 шақырым болады. Мұндай қашықтықтағы өткелге Storm Shadow снарядтары емін-еркін жете береді.
Кеше 28 шілде, жұма күні түнде Севастополь түбіндегі Казак айлағында күшті жарылыс болды. Осының салдарынан РФ армиясының кезекті қару-жарақ қоймасының күлі көкке ұшыпты.
Лайым солай болсын! Rast.kz есіл-дерті бұрынғы империяны қайта қалпына келтіру болып отырған ынсапсыз Ресей билігі тарапынынан басталған бұл басқыншылық әділетсіз соғыста өз отандарын қорғап жатқан Украина патриоттарының тезірек жеңіске жетулеріне шын жүректен тілектестік білдіретінін әсте жасырмайды.
