USD
АСТАНА. 14 шілде. Түркістан облысының Сарыағаш ауданында 5 жасар қызды зорлап, өлтіру ісіне қатысты тергеп-тексеруді бас прокурор өз бақылауына алды. Бұл туралы Қазақстан Республикасы Бас прокуратурасы баспасөз қызметінің мәліметіне сілтеме жасаған rast.kz хабарлайды.
Оқиға кеше, 13 шілде күні орын алды. Сарыағаш ауданында зорлықпен өлтіру белгілері бар кішкентей қыздың мәйіті табылды.
Сол күні полиция қызметкерлері осы қылмысты жасады деген күдікпен бұрын бірнеше рет сотты болған аудан тұрғыны Г.-ны ұстап, уақытша ұстау оқшаулағышына қамады.
Осы факт бойынша Қылмыстық кодекстің 99-бабының 3-бөлігі (жас баланы өлтіру) бойынша сотқа дейінгі тергеп-тексеру басталды.
Бұл қанды оқиға Мемлекет басшысы Қасым-Жомарт Тоқаетың назарына ілікті. Ол осыған байланысты Бас прокуратураға тиісті тапсырма берді. Қазір сол пәрмен бойынша оқиғаның барлық мән-жайы анықталу үстінде.
Күдікті Г.-ның 2006 жылы адам өлтіргені үшін 10 жылға бас бостандығынан айыру жазасына кесілгені анықталды.
2023 жылдың мамырында Г. алкогольдік ішімдік ішу барысында орын алған жанжалда ауылдасын балтамен ұрғаны үшін тағы сотталған. Сот Г. жәбірленушімен татуласқанын және оның бұрынғы соттылығы өтелгенін ескере отырып, оған пробациялық бақылау белгілей отырып, 3 жыл бас бостандығын шектеу тағайындаған.
Бас прокуратура аталған үкімге жазаны қатаңдату және бас бостандығынан айыруды тағайындау туралы кассациялық наразылық келтірді.
Сол сияқты пробациялық бақылауда болған Г.-ның аса ауыр қылмыс жасағаны ескеріле отырып, пробация қызметінің қызметкерлеріне қатысты салғырттық фактісі бойынша сотқа дейінгі тергеп-тексеру қолға алынды.
Президенттің тапсырмасына сәйкес жеке адамға қарсы аса қауіпті қылмыстар үшін қылмыстық жауапкершілікті күшейтуге бағытталған заңнамалық түзетулер топтамасы әзірленуде.
Осы қылмыстар бойынша санкцияларды қайта қарау, жазаларды тағайындау және одан босату, соттылығын өтеу тәртібін, жеке адамға қарсы ауыр және аса ауыр қылмыстар үшін жазасын өтеп жатқан адамдарға әкімшілік қадағалауды белгілеу шарттарын өзгерту мәселелері пысықталуда.
Қылмыстық істі тергеп-тексеру барысы қазір бас прокурор Берік Асыловтың жеке бақылауында тұр.
«Азаттық радиосының» дерегінше, кеше ауыл тұрғындары болған оқиғаға байланысты наразылық шеруіне шығып, күдіктіні халықтың қолына беруді талап еткен. Ақпаратты полиция да растады, бірақ тұрғындар қазір тынышталған.
