Ауғанстан – Иран шекарасындағы атыс кезінде үш әскери оққа ұшты
ТЕГЕРАН. 29 мамыр. Мамырдың 27-сі күні Ауғанстан – Иран шекарасында орын алған ұрыс қимылдары барысында екі жақтан кемінде үш шекарашы қаза тапқан көрінеді. Бұл туралы Reuters ақпарына сілтеме жасаған rast,kz хабарлайды.
«27 мамыр күні кешке Иран және Ауғанстан шекарасында ұрыс қимылдары болды. Нәтижесінде кем дегенде, үш адам қазаға тапты: олардың екеуі – ирандық шекарашы және бір талиб содыры», – делінген агенттік хабарламасында.
Иран мемлекеттік IRNA агенттігінің хабарынша, Тегеран тағы екі бейбіт тұрғынның жарақат алып қалғанын растайды. Басылымның мәліметінше, талибтер «айтарлықтай» шығынға ұшыраған. Ал «Талибан» өкілі тараптардың әрбірі жағынан бір-бір адам ғана оққа ұшқанын айтады.
Алайда қазіргі кезде шекарада не болып жатқаны оншалықты түсінікті емес. Сол сияқты атыстың қалай басталып кеткені, оны кімнің бастағаны жөнінде де ір қилы қауесет бар. Ауғанстан ішкі істер министрлігі бірінші болып иран шекарашыларының оқ атқанын алға тартады. Олар ауғанның Нимроз уәләяты жеріне оқ жаудырыпты-мыс. «Талибтер содан кейін жауап қайтаруға мәжбүр болды», – деді Ауғанстан ішкі істер министрлігінің өкілі Абдул Нафи Такор.
«Қазір жағдай толық бақылауда ұсталып тұр. Ислам әмірлігі өзінің көршілерімен соғысқанды жөн көрмейді», – деді ол.
Иран өз кезегінде «Талибанның» бірінші болып оқ шығарғанын сөз етеді. «Халықаралық заңдар мен тату-тәтті көршілік қағидаттарын сақтамаған талиб күштері Сасоли бақылау-өткізу бекетіне қарай оқ атты… бұған шешімді жауап қайтаруға тура келді», – деді Иран полиция бастығының орынбасары Касем Резаи.
IRNA сондай-ақ өткен аптада осы бекет командирін «Талибан» содырлдарының өлтіріп кеткенін жазады.
Осы инциденттен кейін Иран билігі Милак – Зарандж шакара асуын «бұдан арғы жағдай анықталғанға дейін» жауып тастады.
