Кишиневтегі тәртіпсіздікті ұйымдастырушылар әшкереленіп, қолға түсті
КИШИНЕВ. 12 наурыз. Молдова астанасында жаппай тәртіпсіздік жасаудың айла-амалын жасаушылар тобы мүшелері анықталып, олар түгел қамауға алынды. Бұл туралы молдован ресурстары сүйенген rast.kz хабарлайды.
«Ресейдің арнаулы қызметі Молдовадағы ахуалды тұрақсыздандыруды, соның ішінде бүгін «Шор» партиясының мүшелері мен оның жақтастары ұйымдастырған наразылық акциясын өткізуді жоспарластырған», – делінген Newsmaker хабарламасында.
Молдова Ұлттық полициясының басшысы Виорел Чернеуцяну 12 наурыз күні журналистер алдында осы жайында айтып берді.
Оның сөзіне сілтеме жасаған «Европейская правда» сайты бұған дайындықтың жыл басынан бері жүргізілгенін баяндады. Чернеуцяну құқық қорғау органдарына 9 наурыз күні Кишиневке келген Ресей азаматын қолға түсірудің орайы келгенін айтты. Бас полицейдің сөзіне қарағанда, оның мақсаты Молдовадағы ахуалды тұрақсыздандыруға ынталы адамдары соған оқытып үйрету болған.
«Біздің агентіміз сол топқа бүркеншік атпен кріп, Ресейден келген адаммен байланыс жасасқан. Ресейдің екінші адамы – Андрей Молдоваға бүлікшіл кісілерді тәртіпсіздік жасауға үйрету үшін келген. Ол Молдовада бұрын да бірнеше рет болып кеткен, бірақ ізін аңду мүмкін болмауы үшін фамилиясы мен құжаттарын бірнеше рет өзгерткен», – деді Чернеуцяну.
Полиция басшысы сондай-ақ болашақ тәртіпсіздіктердің дем берушілері әрбірінде 10 адам бар 10 топ құрып алғанын, оларды акцияларға өздері дайындағанын әңгімеледі. Бұлардың бәрінің әрекет-қимылдары Ресейден үйлестіріліп тұрған.
Арбауға түсіп қалған молдовалық тұрғындардың әрбіріне тәртіпсіздіктерді ұйымдастыруға қатысқандары үшін $10 мыңнан ақша беруге және Молдовадағы саяси күштер тарапынан қолдау көрсетуге уәде етілген.
Полиция кеше сол азғындардың жетеуін қолға түсірді.
Еске сала кетейік, Құрама Штаттар ресейлік барлау қызметімен байланыстары бар бұл тұлғалар Молдова үкіметін орнынан тайдырып, онда Ресейге бүйрегі бұратындарды әкеп қою мақсатында қарсылық қозғалыстарын ұйымдастырмақшы болған деп есептейді.
