РФ Брянск облысында арандату жасауды жоспарлаған болып шықты

МӘСКЕУ. 3 наурыз. Брянск облысына Украина жақтан жасалған кешегі «террорлық шабуылы» РФ арнайы қызметі ұйымдастырған қойылым екені әшкере болып қалды. Бұл туралы бұқаралық ақпарат құралдарына сілтеме жасаған rast.kz хабарлайды.

Gulagu.net жобасының РФ «иноагенттері» тізіміне кіргізілген кураторы Владимир Осечкин Брянск облысында «өзгенің туы астында» жасалған операцияның ұңғыл-шұңғылын ашып беріп, мұның РФ арнайы қызметі тарапынан ұйымдастырылған арандату әрекеті екенін баяндады.

Осылайша Брянск облысындағы орын алған оқыс оқиға Ресей пропагандасының Украина тарапынан жасалған террорлық шабуыл етіп көрсету үшін алдын ала ойластырып алған «жалған тудың астындағы» арзан операциясы болып шықты. Ол арада бір өтпей жатып-ақ айдай әлемге паш етілді, яғни масқарасы шығарылып әшкереленді.

Владимир Осечкиннің мәліметі бойынша, Брянск жеріндегі оқиға жоспар бойынша өрби алмай қалған.

Оның баяндауынша, «Украинаның диверсант-барлау тобының Ресей облысы аумағына басып кіріп, кепілдіктер алуы» жоспары алдын ала мұқият әрі өте қатаң сақтық тәртібімен әзірленген. Ол РФ мемлекетінің басшысының алдын ала келісімімен және бақылауымен қолға алынған. Операцияға қатысушылар күні бұрын дайындалып, олардың міндеттері белгіленген, территория артық әскери күштерден тазаланған. Оның бүге-шігесіне дейін білетіндер мәнбелердің мәліметтерінше, тіпті диверсанттардың өлі денелері мен бейбіт тұрғындар арасынан болатын құрбандықтардың мәйіттері де дайындалып қойылған.

Бірақ ресейліктердің арандату жоспарын оқиға орнына оның басталар уақытынан бір жарым-екі сағат бұрын келіп қойған «Орыс еріктілер корпусының» сарбаздары бұзып жіберген. Олардың кенеттен пайда бола кетуі мұндағы жұртты қатты шатастырған.

Осы жерде еске түсіре кететін бір жайт, украинның «Північ» командованиесі Ресейдің Украинаға басып кіруінің бір жылдығы қарсаңында РФ тарапынан арандату әрекеттері ұйымдастыруы ықтимал екенін мәлімдеген болатын.

Сондай-ақ Дания премьер-министрі «Солтүстік тасқын» құбырындағы апаттың ойдан құрастырылып шығарылған диверсия екенін бірнеше рет айтып ескерткен еді.

Ескерту!  

rast.kz сайтының кез келген материалын редакцияның арнайы рұқсатынсыз көшіріп алып жариялауға тыйым салынады