USD
КИЕВ. 12 қараша. Кеше кешке Украина армиясы Херсонның батыс жағынан қала аумағына келіп кірді. Бұл туралы The Moskow News хабарлады.
Украин әскерлерін Херсонның Шумен ауданының тұрғындары ұлттық жалауларды желбіретіп қарсы алды. Херсондықтар содан кейін мемлекет жалауларын қолға алып, қаланың орталық алаңына да жиналды.
Жалаулардың бірін жергілікті жұрт Херсон облыстық әкімшілігі ғимаратының төбесіне апарып ілді.
The Guardian жазғандай, Украина Қарулы күштері Ресей армиясы наурыздың басында басып алған қаланың орталығына жауды тықсыра қуып отырып жетті. Басылымның ақпарынша, украин әскери күштері Херсонның Корабель ауданынан да көрінген.
Украина Қорғаныс министрлігінің бас барлау басқармасы «Херсон Украинаның бақылауына алынып жатыр, армия бөлімдері қалаға кіре бастады» деген мәлімет таратты.
Басқарманың байыбынша, Ресей әскерилері қазір украин армиясының толық бақылауында тұр, олардың кез келген әнтек әрекетіне заматында «жауап қайтарылады».
Ресей әскерлері Херсон маңындағы елді мекендерден кете бастаған бойлары жергілікті тұрғындар «Ресей мұнда мәңгілік болады» деген жазуы бар баннерлерді жұлып алып тастауға кірісіп кетті.
Қазір украин әскерлері Херсон облысының Херсон қаласы мен Днепр өзенінің оң жағалауындағы жерлерін толық азат етуге жақын қалды, деп баяндады Херсон облыстық әскери әкімінің кеңесшісі Сергей Хлань.
Оның айтуынша, өзеннен арғы бетке уақытында өте алмай қалған бірқатар орыс солдаттары өздерінің әскери формаларын лақтырып, қарапайым адамдардың киімдерін киіп алып, сыртқа шығып кетуге әрекет етіп жатқан көрінеді. Олардың кейбірін жергілікті тұрғындар украин ұлттық полициясына ұстап берген.
Херсон қаласының азат етілгені туралы ресми хабарлама тек украин әскерлері қаланы толық қауіпсіздендіргеннен кейін ғана жарияланатын болады. Әзірге қалада жау элементтері баршылық. Облыс орталығын олардан тазартып шығу үшін тағы бір апта уақыт керек болуы мүмкін.
Украина президенті Володимир Зеленский 10 қараша күні елдің оңтүстігіндегі 41 елді мекеннің жау тырнағынан босатылғанын хабарлаған еді. Соның ішінде Днепрдің оң жағалауындағы аса маңызды логистикалық торап – Снигировка да бар. Бүгін сол Снигировкада нағыз мерекелік шаттық салтанат құрды. Елді мекеннің жаудан босатылғанынан қатты қуанған халық түнімен осы қуанышты тойлады.
