USD
МӘСКЕУ. 23 мамыр. Ресей президенті Владимир Путиннің өзіне жақын жүрген кімдердің пікірлерімен санасатыны аңғарылып қалды. Бұл туралы DonPress хабарлады.
«РФ президенті Владимир Путиннің айналасы іс жүзінде толық «сүзгіленіп» қойылғандықтан, онда Батыс билікті ауыстыру жөнінде келісімге келе алатын бірде-бір тұлға таппай отыр», – делінген хабарламада.
Белгілі политтехнолог және жазушы Михаил Шейтельман «Украина 24» телеарнасына берген сұхбатында осыны айтты.
Оның сөзіне қарағанда, Путин билік басына отырған жылдарында өзінің айналасына түгел жалтақ, қорқақ, жасқаншақ, өзінің мойнына жауапкершілік ала алмайтын батылсыз адамдарды жинап алған. Дәл қазіргі мәурітте мұнда ол пікірлерімен санасатын үш адам ғана бар. Бұлар – Ресей Қауіпсіздік кеңесінің хатшысы Николай Патрушев, Қорғаныс министрі Сергей Шойгу, сондай-ақ «Путиннің жеке армиясы» – Росгварияның жетекшісі Виктор Золотов.
«Ондағы ахуал барынша қарапайым. Онда бір ғана адам бар, ол – Путин. Онда тағы ол ойлау қабілеті мен шешім қабылдауға қауқары бар деп санайтын үш адам жүр. Біз оларды білеміз – Патрушев, Шойгу және Золотов… Қалғандары – нағыз көкөніс өнімдер… Мишустин, Лавров қандай? Олар жайлы не айтуға болады? Олар – бар болғаны декорациялар», – деді Шейтельман.
Сонымен бірге Украинадағы соғыс Ресей генералдары арасында айтарлықтай салмақты тірестің туып кетуіне жол ашып бергені айтылып жатыр. Олар майдан даласында солдаттардың шыбындай қырылып жатқаны үшін бірін-бірі кінәлап, өзара ұстасып қалып береді. Мысалы, РФ Бас штабының бастығы Валерий Герасимов пен Оңтүстік әскери округтің қолбасшысы Александр Дворниковтың арасы көптен бері жақсы емес. Екеуі соғыстағы сәтсіздікті бір-бірлерінен көріп отыр.
