USD
АСТАНА. 17 ақпан. Елорда әкімдігінің бұдан біршама уақыт бұрын ескі сауда үйі ғимаратын 9,5 млрд теңгеге сатып алғаны қоғам назарына ілігіп жатыр. Бұл туралы «Экспресс К» газеті хабарлады.
Осыған орай әкімдік өкілдерінің мәлімдеуінше, аталмыш ғимарат ақша үнемдеу мен қызмет көрсету сапасын арттыру үшін алынған.
Ал журналист Михаил Козачков Астана қалалық әкімдігі 9,5 миллиард теңгеге бағалап, сатып алып отырған ғимараттың 1917 жылы салынғанын жазды. Бүгінде сауда үйінің қызметін атқарып отырған бұл ескі ғимаратты сатып алғанша, мұнша ақшаға жаңа жай салып алуға да болар еді ғой.
«Елорда әкімдігіне қарасты «Астана шаруашылық басқармасы» атты фирма бар. Оның құрылтайшысы – әкім аппараты. 2021 жылғы көктемде бұл компания есепшотына 9,5 миллиард теңге түседі. Кейін бұл ақшаға «Sine Tempore» сауда үйін сатып алынады. Әдемі әрі еуропалық атауына қарамастан, бұл ғимарат – кеңес заманынан қалған Целиноград қаласының Орталық әмбебап дүкені. Тіпті ғимараттың бір бөлігі 1917 жылы салынған», – деп жазады журналист.
Оның айтуынша, Алтай Көлгінов басқаратын елорда әкімдігі ғимаратты ешқандай мемлекеттік тендер жарияламай, нарықтағы басқа ұсыныстарды қарастырмай сатып алған.
Ал қала әкімдігінің мәліметінше, бұл ғимарат оларға тиімді жұмыс істеп, қаржы үнемдеу үшін қажет.
«Қазіргі кезде қалалық әкімдік қарамағында 30-дан астам ұйым мен басқарма бар. Олардың ешқайсында өз ғимараты болмағандықтан, отыратын жерлерін жалға алады. Бұған жыл сайын 1 миллиард теңгеге жуық ақша кетеді. Қаланың әртүрлі бөлігінде орналасқан бұл ұйымдамдарды бір шатырдың астына жинау үшін «Sine Tempore» ғимаратын сатып алу туралы шешім қабылданды», – дейді әкімдік.
Бұлардың уәжіне қарағанда, осындай шешімнің арқасында жалға алуға кететін ақша үнемделеді. Бұдан бөлек әкімдіктің барлық ұйымы бір жерде болғандықтан қызметтерді «бір терезе» қағидаты бойынша алуға мүмкіндік туады.
«2020 жылы бұл ғимараттың құны 12,6 миллиард теңге және 11,7 миллиард теңгеге бағаланған еді. Алайда, 2021 жылы тағы бір тәуелсіз бағалау жүргізіліп, оның бағасы 9,5 миллиард теңгеге болды. Ғимаратты сатып алуға қалалық мәслихат келісім берді»,– дейді әкімдіктер.
