«Талибан» рақымшылық уәдесінен кейін полиция бастығын өлтірді

КАБУЛ. 20 тамыз. Бұдан 10 күн бұрын Ауғанстанды басқаруды өздеріне алған «Талибан» артынша жариялаған «жалпыға ортақ рақымшылық» тәртібін өздері бұзды. Бұл туралы News Week хабарлады.

Тәліптер бірнеше күн өткеннен кейін, кеше бейсенбіде Гератқа жақын жердегі Бадгис провинциясында полиция бастығы Хаджи Мулла Ачакзайды атып өлтірді.

Твиттер әлеуметтік желісінде жарияланған видеода содырлардың Ачакзайды қалай өлтіргені түсірілген. Көзі байланып, өзі тізерлетіліп қойылған полиция бастығын тәліптер желкесінен бірнеше рет атады.

Көтерілісшілер ауған азаматтық үкіметінің әскерлерімен бірге «Талибанмен» ұзақ уақыт шайқасқан Ачакзайдың соңына түседі. Оны әскерлер қашып кеткеннен кейін қолға түсіреді.

«Өткен түнде тәліптер оның жатқан жерін қоршап алды. Содан кейін Ачакзайдың берілгеннен басқа амалы болмады. «Талибан» оны барлаудың жоғары лауазымды басшысы болғасын атып тастады», – дейді Ауғанстан қауіпсіздік қызметі басшысының кеңесшісі Насер Вазири.

Ачакзай – тәліптер бірден нысанаға алған көптеген үкімет шенеуніктерінің бірі. Содырлар оны ешбір сотсыз-ақ атып тастады. Рақымшылық жөніндегі уәде да бос сөз болып шықты. Демек, алда әлі талай шенеунік ажал құшатын шығар.

Бұдан алдын «Талибан» ауғанның Тахар провинциясында бір әйелді паранжа жамылып жүрмегені үшін-ақ оққа байлаған болатын.