Израиль Газа секторына шабуылды үдете түсті
ИЕРУСАЛИМ. 16 мамыр. Аптаға жуық уақыттан бері Израиль қарулы күштері мен Палестина жасақтары арасында жаңа соғыс өрті тұтанып, қан майдан жүріп жатыр. Бұл туралы «Реальное время» хабарлады.
«Бұл күндері араб-израиль жанжалының жаңа иірімі басталды – міне, аптаға жуық уақыттан бері Палестинаның ХАМАС ұйымы мен Израиль армиясы біріне-бірі зеңбіректерден атқылап, ұшақпен бомба жаудырып жатыр, ал Израиль территориясында араб және еврей тұрғындар арасында кескілескен ұрыстар жүруде», – делінген хабарламада.
Бүгінгі таңертеңгі ахуал бойынша, ХАМАС-тың бақылауындағы Газа секторынан 1,7 мың басқарусыз ракета (олардың көп бөлігін Израильдің «Темір қалқан» жүйесі жолдан тосып алған) жіберіліп, жеті израильдік қаза тапқан, 523 адам жарақат алған (Израиль армиясы баспасөз қызметінің мәліметінше). Бұған жауап ретінде ЦАХАЛ Газа секторындағы нысандарға 650 авиабомба тастады, нәтижесінде 115 адам қаза тауып, 621 адам жарақат алды. Қаза тапқандардың 47-сі кәмелетке толмаған балалар екен.
Қазір Израиль ішіндегі қақтығыстар арасында «Әл-Ақса» мешітіне апаратын Шам қақпасы маңындағы жанққиярлық шайқастарды айрықша атап өтуге болады.
Палестина БАҚ-тарының мәліметінше, жанжалдың басы 10 мамыр күні рамазан айының аяқталу құрметіне намаз оқуға бара жатқан палестиналықтарды Израиль полицейлерінің кес-кестеп жібермеулерінен басталған. Мұның алдында қақтығыс соттың шешімімен бірнеше араб отбасылары үйлерінен шығарып жіберілген Шейх-Джаррах ауданында орын алған. Бұған сол жерден Шығыс Иерусалимді Вифлеемнен бөліп тастайтын құрылыс жобасын салу идеясы себеп болған. Мамырдың 8-і күні бұрқ еткен жанжал түні бойы ұрыс жүруіне от қойып берген.
Қазір әлем осы оқиғаларға ерекше ден қойып, құлақ түріп отыр. Көптеген елдердің елшілері Израиль мен Палестинаның арасында жүріп жатқан соғыс қимылдарын тоқтату жөнінде ұсыныстар айтуда. Сонымен бірге, АҚШ сияқты бұрыннан Израиль жағындағы елдердің тағы да осы позициядан көрініп тұрғаны байқалады. Мұны өткен аптада АҚШ президенді Джозеф Байден Израиль премьер-министрі Биньямин Нетаньяхумен телефон арқылы сөйлескен сөзінде де аңғартты. Ол палестиналықтардың Иерусалим мен Тель-Авивке жасап жатқан шабуылдарын айыптады.
Мұның бір мезгілде Түркия президенті Реджеп Ердоған Израильдің араб жұртына қарсы жүргізіп жатқан соғыс қимылдарына террор деген баға берді.
