USD
ВАШИНГТОН. 28 наурыз. АҚШ президенті Дональд Трамп елде коронавирус эпидемиясының күннен күнге өрши түсуінен тұрғындар арасында үрейдің күшейіп кетуіне байланысты кеселді жеңу үшін Қытайдан көмек сұрауға дайын. Бұл туралы «Вести.Ру» хабарлады.
Құрама Штаттарда коронавирус құрбандарының саны 1475-ке жетті. Мұнда тәуліктік өсім жүздеп саналады.
Джонс Хопкинс университетінің мәліметі бойынша, жұма күннің кешінде жалпы 1475 адамның қайтыс болып, 816 адамның сауығып шыққаны тіркелген. Мейлінше көп қайтыс болғандар Нью-Йорк (500-ден аса) пен Вашингтоннан (200-ден аса) шығып отыр.
Конгресс палатасының өкілдері экономиканы ынталандыруға көмек көрсетудің АҚШ-та бұрын-соңды болмаған қаржысын – $2 трлн ақшаны бюджеттен бөлуді қолдады.
Нью-Йоркте қазір тұмылдырықтардың жетіспеушілігі, Чикагода дәрігерлердің кемшіндігі байқалады.
Инфекция тіпті армия қатарына да жайылып барады. Мына жағдайдан түршіккен Трамп өзі жақында ғана коронавирусты «қытай вирусы» деп мысқылдағанына қарамастан, қазір Бейжіңнен көмек сұрауға дайын отыр.
Бұрнағы күні АҚШ президенті Ақ үйдегі кезекті брифингін беру кезінде елдегі жағдайдың шынында өте ауыр екенін мойындады. Бұл жолы Қытайды мысқылдауды қойып, әңгіменің әуенін кілт өзгертті. Ал бұдан шыққаннан кейін Twitter-ге өзінің Қытай басшысы Си Цзиньпиньмен телефон арқылы сөйлескенін жазды. Айтуына қарағанда, Қытай лидері Вашингтонға эпидемияны жеңуге көмектесуді ұсыныпты. Бұдан үш күн бұрын ғана Трамп індетті Американың өзі-ақ екі-үш аптаның ішінде жеңіп шығатынына уәде беріп еді.
