USD
ТАШКЕНТ. 23 мамыр. Өзбекстандағы Сардоба су қоймасы тоғанының бұзылып кетуіне байланысты іс бойынша екі адам құлып астына алынды. Бұл туралы Podrobno.uz хабарлады.
Бірақ бас прокуратура фигуранттарға қандай айып тағылып отырғанын ашып айтқан жоқ.
Өзбекстанның бақылау ведомствосындағылар мамыр айының басында Өзбекстанның Сырдария облысына қарасты Сардоба ауданындағы су қоймасында орын алған төтенше жағдай фактісі бойынша тергеу амалдары жүріп жатқанын атап өтті.
«Қазіргі таңда аталмыш іс бойынша екі тұлға күдікті ретінде тартылды, оларға қатысты «құлып астына алу» шарасы таңдап алынды. Іс бойынша ақиқатты анықтауға кедергі келтірілуінің алдын алу мақсатында қалған жай-жағдай егжей-тегжейлі айтылмайды», – деді прокуратурадағылар.
ТЖ биылғы 1 мамыр күні орын алды. Тоғанның бұзылып кетуіне байланысты Сардоба, Ақалтын және Мирзаабад аудандарындағы 28 махалланың 90 мыңға жуық тұрғыны қауіпсіз жерлерге көшірілді, 56 адам ауруханаға жатқызылды, 6 адам қаза тапты. Бұдан бөлек, 2 570 жеке және 76 көп пәтерлі үй қирады, 1 781 жеке және 52 көп қабатты үйді ішінара су басты, 70 әлеуметтік, өндірістік және сервистік нысан, 20 мыңға жуық ауыл шаруашылық жерлері, 828 шақырым жолдар, электр, газ, су және байланыс желілері бүліншілікке ұшырады.
Сардоба су қоймасы тоғанының бұзылып кету зардабын Қазақстанның оңтүстігіндегі Түркістан облысы Мақтаарал ауданының бірқатар ауылдары да тартты. Мыңнан аса үй, сондай-ақ мектептер, балалар бақшалары, медициналық мекемелер су астында қалды. Топан кезінде 31 мыңнан астам адам қауіпсіз жерлерге көшірілді.
