USD
АСТАНА. 11 қыркүйек. Roca Group компаниясы Қызылордада санитарлық-техникалық өнім шығаратын зауыт құрылысын жүргізуді биылғы қазан айында қолға алады. Бұл туралы Үкімет баспасөз қызметінің дерегіне сүйенген rast.kz хабарлайды.
Қазақстан Республикасы Премьер-министрінің бірінші орынбасары Нұрлыбек Нәлібаев «Roca Group» компаниясының өкілдерімен кездесіп, осы мәселені талқылады.
Испанияның Roca Group компаниясы – әлемдегі санитарлық-техникалық бұйымдар мен оған қатысты жабдықтарды өндіретін ең ірі өндіріс орындарының бірі.
«Мемлекет басшымыз Қасым-Жомарт Кемелұлының: «Жаңа инвестициялар ең алдымен еліміздегі заманауи өнеркәсіптің негізін қалыптастыруға бағытталуы керек» деген тапсырмасын орындауда ауқымды жұмыс қолға алынған», – деп жазды бүгін әлеуметтік желіде Нұрлыбек Нәлібаев.
Еске сала кетейік, Үкімет басшысы Олжас Бектенов 2025 жылы маусым айында Roca Group жетекшілерімен кездесіп, инвестициялық жобаны жүзеге асыру қағидаттары туралы негіздемелік келісімге қол қойылған болатын. Сол уақытта Нұрлыбек Нәлібаев Қызылорда облысының әкімі ретінде аталмыш жобаны жүзеге асырудың алғы шарттарын жасауға қатысты.
«Бұл Қызылорда облысын басқарған кезде бастау алған жоба болғандықтан, мен үшін өз саласында озық деп танылған компания бастамасының әр кезеңі маңызды», – деп жазды Нұрлыбек Машбекұлы осыған орай.
Кейінгі кезеңде жоба одан әрі дамыды, компанияның инвестиция көлемі бастапқыда мәлімделген 70 млн еуродан 83 млн еуроға дейін артты. Қазақстан Республикасының Үкіметі, Қызылорда облысының әкімдігі және инвестор арасында қажетті мемлекеттік қолдау шараларын көздейтін Инвестициялар туралы келісімге қол қойылды.
Қазіргі таңда болашақ зауыттың дизайны мен эскиздік жобасын әзірлеу аяқталды, оны одан әрі жобалау жалғасуда. Сонымен қатар Қызылорда облысында инсталляциялық жүйелер мен араластырғыштарды құрастыру өндірісін іске қосу бойынша жұмыстар жүргізілуде.
Кәсіпорынның өндірістік қуаты жылына 500 мың дана деңгейінде болады деп жоспарланған, сонымен қатар келешекте өндіріс көлемін 1 млн данаға дейін арттыру мүмкіндігі қарастырылған. Жоба аясында шамамен 300 тұрақты жұмыс орнын ашу жоспарластырылып отыр. Өнім Қазақстанның ішкі нарығына жеткізіліп, Орталық Азия елдеріне экспортталады.
Кездесу барысында жобалық құжаттаманы мемлекеттік сараптамадан өткізу, санитарлық-техникалық өнімдер саласындағы нормативтік базаны жетілдіру, Roca өнімдерінің ел аумағында салынып жатқан және жүзеге асыру жоспарланған нысандарда қолданылуын қамтамасыз ету мәселелері де қаралды.
Нұрлыбек Нәлібаев зауытты уақтылы іске қосудың және отандық тауар өндірушіге жан-жақты қолдау көрсетудің маңыздылығын атап өтті.
Кездесу қорытындысы бойынша мемлекеттік органдар мен мүдделі ұйымдарға инвесторды сүйемелдеу, мемлекеттік сараптамадан жедел өтуін қамтамасыз етуді және зауыт құрылысын 2026 жылғы қазан айында бастауды тапсырды.
