ҚЫЗЫЛОРДА. 23 қазан. Қызылордада Ұлттық мереке – Республика күні тойлануға екі күн қалғанда облыс әкімі Мұрат Ергешбаев сол жағалаудағы екі тұрғын үйдің 160 пәтерінің кілтін иелеріне табыс етті. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Аймақ басшысы жиналған жұртшылықты Республика күнімен құттықтап, егемен ел атанған, тарихи шешім қабылданған күннің маңызына тоқталды.

«Мемлекет басшысы Қасым-Жомарт Кемелұлы «Қолжетімді баспана – арман емес, біздің азаматтарымыздың алдындағы міндетіміз» деп атап көрсеткендей, соңғы төрт жылда үй кезегінде тұрған азаматтарға 8 мыңға жуық пәтер беріліп, 30 мыңнан астам жерлесіміз баспаналы болды. Жыл соңына дейін тағы 3 мыңға жуық пәтер беріліп, 10 мыңға жуық тұрғынды баспанамен қамту жоспарланған. Бүгін игі бастаманың жалғасы ретінде тұрғын үй кезегінде тұрған жерлестерімізге аумағы 12 мың шаршы метрге жуық 160 пәтердің кілтін табыстап отырмыз», – деді Мұрат Нәлқожаұлы.
Шарада тұрғын үйлерді салған мердігер мекеменің қызметкерлері облыс әкімінің Алғыс хатымен марапатталды.
Қазақстан Халық кеңесінің мүшесі Мейрамбек Жұмашев сөз сөйлеп, мемлекет және қоғам қайраткері Нәжмадин Мұсабаев бата берді.
Сол жағалау – қаланың қарқынды дамып келе жатқан шағын аудандарының бірі. Бүгінде тұрғындар саны 27 мыңнан асты. Бұл аумақта 145 көп қабатты тұрғын үй бар, 21 әлеуметтік нысан және 14 ірі бизнес нысаны халыққа қызмет етуде. Тағы 50 нысанның құрылысы қарқын алған.
Оның 25-і көп қабатты тұрғын үй, сонымен қатар әлеуметтік және кәсіпкерлік нысандар да бар. Заманауи сәулет өнерімен үйлескен зәулім ғимараттар мен тұрғын үйлердің басым бөлігін Сыр құрылысшылары салып жатыр.

USD




