Қызылорда облысында жол апатынан 8 адам қаза тапты

ҚЫЗЫЛОРДА. 16 қаңтар. Кеше Қызылорда облысында орын алған жол-көлік оқиғасы салдарынан 8 адам опат болды. Бұл туралы rast.kz хабарлады.

Қызылорда облысы полиция департаментінің мәліметінше, қайғылы оқиға 15 қаңтар күні Шымкент – Самара тасжолының 1397 шақырымында, Арал ауданы Аралқұм елді мекенінің тұсында болған.

«ҚР Қылмыстық кодексінің 345-бабының 4-бөлігі (Автомобильдi басқаратын адамның жол жүрісі қағидаларын бұзып, абайсызда екi немесе одан да көп адамның өлiмiне әкеп соғу) бойынша сотқа дейінгі тергеп-тексеру әрекеттері қолға алынды. Жол апаты салдарынан 8 адам қайтыс болды. Тиісті сот сараптамалары тағайындалды. Қазіргі таңда оқиғаның мән-жайлары анықталып жатыр», – делінген полиция хабарламасында.

Аймақта ауа райының қолайсыздығына байланысты облыс комендатурасы жүргізушілерді жылдамдық мөлшерін арттырмай, жолда жүру ережесін сақтауларын сұрайды. Қажетті ара қашықтықты ұстап, қауіпсіздікті қамтамасыз етіп, жол ережесін қатаң түрде ұстану қажеттігін ескертеді.

Кешелі бері Қызылорда облысында кей жерлерінде тұман түсіп, кей жерлерінде жаңбыр жауып жатыр.