Жаңалықтар жаңғырығыҚайнар

«Үздік педагог-2020» байқауының жеңімпаздары анықталды

АСТАНА. 2 қазан. Білім және ғылым министрі Асхат Аймағамбетов «Үздік педагог-2020» байқауының жеңімпаздарын марапаттады. Бұл туралы министрлік баспасөз қызметі дерегіне сүйенген rast.kz хабарлады.

«Ең басты мамандық – ол ұстаз. Өйткені, ұстаз барлық мамандық иесін тәрбиелейді, білім береді», – деді министр байқау қорытындысын жариялау жиынын ашарда сөйлеген сөзінде.

Жиын онлайн-форматында өтті.

Биыл байқауға еліміз бойынша 143 мұғалім қатысты. Жеңіп шыққан 64 ұстаздың әрқайсысына «Үздік педагог» төсбелгісі мен 2 788 000 теңге (1000 АЕК) көлемінде сыйақы тапсырылды.

Салтанатты іс-шарада Асхат Аймағамбетов қазіргі жағдайда аянбай еңбек етіп жүрген барша мұғалімдерге алғысын білдірді. Сондай-ақ мемлекет тарапынан білім беру саласына үлкен көңіл бөлініп жатқанын әңгімеледі.

«Мемлекет басшысы Қасым-Жомарт Тоқаев білім саласына ерекше назар аударып, жуырдағы Жолдауында да осы мәселеге үлкен көңіл бөлді. «Ұстаз мәртебесі туралы» Заң қабылданғанын білесіздер. Заң шеңберінде 70-тен аса түрлі бұйрық, қаулы бекітіліп, іске асырылып жатыр. Мемлекет басшысының тапсырмасымен биыл қаңтардан бастап мұғалімдердің жалақысы 25 пайызға өсті. Алдағы жылы тағы 25 пайызға көтеріледі. Президент осындай тапсырма берді және оны біз орындап жатырмыз. Бүгінгі таңда ұстаздарымыз үшін тиісті жағдай жасауды жалғастыруымыз керек», – деді министр.

Асхат Аймағамбетов педагогикалық мамандықтар бойынша білім алып жатқан болашақ ұстаздардың шәкіртақысы да айтарлықтай көтерілгеніне назар аударды. 1 қыркүйектен бастап олардың стипендиясы 26 мың теңгеден 42 мың теңгеге дейін өсті. Айта кетейік, биыл мұғалім болу үшін оқуға түскен азаматтарға қойылатын талаптар да күшейтілді: шектік балл 50-ден 70-ке дейін көтерілді.

«Үздік педагог» атанған жеңімпаз мұғалімдердің бірі, Атырау облыстық «Білім-инновация» мектеп-интернаты физика пәнінің мұғалімі, Арнұр Қазыбеков шара барысында әріптестеріне жылы лебізін арнап, мұғалім мамандығын жүрек қалауымен таңдау қажет екенін атап өтті.

«Осыдан 10 жыл бұрын мен мектеп қабырғасында жүрген оқушы едім. Физиканы тереңдетіп оқып, түрлі олимпиадаларға қатысып, жүлделі орындарға ие болдым. Күрделі есептерді бір-бірімізге, төменгі сынып оқушыларына түсіндіретін едік. Міне, сол кезден-ақ мен сабақ беру, мұғалім болу өзімнің өмірлік жолым екенін түсіндім. Жастарды ғылымға, білім алуға баулу қазіргі заманда өте өзекті мәселе деп ойлаймын. Мемлекет басшысы бірыңғай оқу платформасын дайындауды тапсырып еді. Бұл тапсырма еліміздің инновациялық педагогтерінің ұйымдастыруымын жүзеге асады деп сенемін. Мен әрдайым жанымнан табылатын отбасыма, ақылын аямайтын әріптестеріме алғыс білдіремін. Педагог мәртебесі – ұстаздардың өз қолында. Мен мектепті «Алтын белгіге» бітіріп, мұғалім боламын деген кезде, барлығы бұл шешіміме таң болды. Бірақ атам: «Балам, қандай мамандық иесі болғың келсең, соны таңда. Өйткені, өмір бойы сол мамандықтың артынан жүресің» деп айтқан болатын», – деді ол.

Айта кетейік, «Педагог мәртебесі туралы» Заңның 8-бабының 6-тармағына сәйкес жергілікті атқарушы органдар педагогтерге республикалық бюджет туралы заңда белгіленген және тиісті қаржы жылының 1 қаңтарына қолданыста болатын айлық есептік көрсеткіштің кемінде 300 АЕК мөлшерінде сыйақы түрінде қосымша ынталандыру төлемдерін белгілеуге құқылы. Ал сол Заңның 9-бабының 4-тармағына сәйкес әкімдіктер біржолғы сыйақы төлей отырып немесе онсыз, жергілікті ерекшелік белгілері мен құрметті атақтарды тағайындау және ынталандырудың өзге де нысандары арқылы, оның ішінде Қазақстан Республикасында белгіленген мерекелік күндерге орай педагогтерді көтермелеудің қосымша шараларын белгілей алады. Яғни бүгін еліміз бойынша мұғалімдер жергілікті әкімдіктер тарапынан қосымша сыйақылар, сыйлықтар алып жатыр.

Тағы көрсету

Пікір қалдыру

Ұқсас мақалалар

Back to top button