Журналист Қуандық Шамахайұлы қайтыс болды
АСТАНА. 29 маусым. Бүгін таңертең белгілі журналист Қуандық Шамахайұлы қайтыс болды. Бұл туралы «Азаттық» радиосы хабарлады.
Туыстарының айтуынша, 59 жастағы журналист өкпесі қабынып, өткен аптаның басында Астанадағы №1 қалалық ауруханаға жатқан. Содан бері жағдайы жақсарып, жазылуға жақын қалған.
Журналистің өзі таңғы 6:00 шамасында Facebook парақшасында қаладағы №1 аурухананың коронавирус жұқтырғандар палатасында емделіп жатқанын, түнде екі медицина қызметкері келіп, белгісіз бір қағазға қол қойғызып, дәрі бергенін жазып, содан күдіктеніп отырғанын жазды.
«Кешеден бері дəрігерлер COVID-19 ауруына тексеріс жасаймыз десіп жүрген. Шырт ұйқыда жатыр едім, сағат 2:00-де дəрігер мен мейіргер келіп, қағазға қол қойдырды да кетті. Сəлден кейін мейіргер келіп, аузыма бір ақ дəрі салды да, су ішкізді. Менен басқасына бермеген. «Не зат?» десем, «вирустан сақтайды» дейді. Қастандық деп күмəнданамын. 3 литр су іштім. Неге маған арнаған? Əреккеттері күмəнді. Ештеңе түсіндірмейді», – деп жазды Шамахайұлы Facebook-те.
Марқұмның ұлы Беріктің айтуынша, журналист ауруханаға 23 маусым күні жатқан.
«Палатада жатты, жасанды желдету аппаратына қосылған жоқ. Кеше жағдайым жақсы, температура жоқ, тәбетім ашылды деп өзі айтты», – деді ол.
Туыстары оңалып келе жатқан Қуандық Шамахайұлының кенет қайтыс болғанына күмәнмен қарап отыр. Ал Астана қаласының қоғамдық денсаулық сақтау басқармасы мәлімдеме дайындап жатқанын хабарлады.
Қуандық Шамахайұлы – Қазақстанның мәдениет қайраткері әрі филология ғылымының кандидаты. Ол 1961 жылы Моңғолияда туған. Сол елдің мемлекеттік университетінде журналистика мамандығы бойынша білім алып, көркем аудармамен айналысқан. Журналист билікке қатысты сыни көзқарастарын ашық білдірумен танымал.
