Қазақша баяндама жасаған Наталья Пан елді риза етті
АСТАНА. 22 мамыр. Парламент Сенатында қазақша баяндама жасаған Әділет министрінің міндетін атқарушы Наталья Пан ел-жұрттың зор ықыласына бөленді. Бұл туралы Azattyq ruhy хабарлады.
Наталья Пан Сенатқа екі құжатты – Мәжіліс мақұлдаған «Қазақстан Республикасындағы сайлау туралы» Қазақстан Республикасының Конституциялық заңына толықтырулар енгізу туралы» және «Саяси партиялар туралы» Заң жобаларын таныстырды.
Әділет министрінің міндетін атқарушы 6 минуттық баяндамасын толық қазақ тілінде жасап, жаңа заң бойынша енді саяси партияны тіркеу үшін оның мүшесі 40 мың емес, 20 мың болса жететінін, әйелдер мен жастарға 30 пайыздық квота қарастырылғанын жеткізді.
«Осы заңнамалық бастамалар әйелдер мен жастарды қоғамдық-саяси өміріне белсенді қатысуға, сондай-ақ көппартиялы жүйені одан әрі қалыптастыруға оң ықпалын тигізеді», – деді ол.
Отырыста Парламент Сенатының төрағасы Мәулен Әшімбаев: «Рақмет, мемлекеттік тілде жақсы баяндама жасадыңыз» дегене алғысын білдірді. Сенатор Дана Нұржігітова да риза екенін айтып қалды. «Расында да Наталья Виссарионовна қазақ тіліне деген құрметіңізді көріп, көңіліміз толып отыр. Көп рақмет сізге», дегенді жеткізді ол.
Алайда, депутат Еділ Мамытбеков сенаторлардың сауалына қазақша қиналмай жауап беріп жатқан вице-министрге өз сұрағын жолдап, оған және орысша жауап бергенін қалайтынын айтып, аудиториядағы әдемі эйфорияның быт-шытын шығарды.
Соңында Сенаторлар Заң жобаларын бірауыздан қолдады.
