USD
ҚЫЗЫЛОРДА. 3 қыркүйек. Бүгін Қызылорда облыстық әкімдігінде «Roca Group» компаниясының өндірістік жобаларына қатысты мәселелерді пысықтау жұмыстары жүргізілді. Бұл туралы Қызылорда облысы әкімі баспасөз қызметінің дерегіне жүгінген rast.kz хабарлайды.
«Қызылорда облысының әкімі Мұрат Ергешбаев «Roca Group» компаниясының басшысы Даниэль Эрнандеспен кездесті. Кездесуде санитарлық-техникалық бұйымдар зауытын салу және компанияның өндірістік жобаларын жүзеге асыру мәселелері талқыланды», – делінген мәтбұғат парақшасында.
Баспасөз қызметі мәлімдегендей, биылғы тамыз айында Премьер-Министрдің бірінші орынбасары Нұрлыбек Нәлібаевтың облысқа жұмыс сапары кезінде жыл соңына дейін смесительдер мен инсталляциялық жүйелерді құрастыру желісін іске қосу жоспарланғаны айтылған. Қазіргі таңда жаңа өндіріс орнының құрастыру цехын орналастыру үшін жергілікті «Панабек» және «Көлік құрылыс компаниясы» серіктестіктерінің өндірістік ғимараттары ұсынылып отыр.
Кездесуде сонымен қатар «Панабек» серіктестігі санитарлық-техникалық бұйымдарды өндіруге қажетті металл инсталляцияларын әзірлеп, компания өкілдеріне таныстырды. Өнім сапасы «Roca Group» компаниясының талаптарына сәйкес келген жағдайда, жергілікті кәсіпкерлермен өзара тиімді әріптестік орнату мүмкіндігі қарастырылады.
Жоба аясында жергілікті қамтуды арттыруға және компания өнімдерін өңірдегі құрылыс нысандарында пайдалануға басымдық беріледі. Атап айтқанда, әлеуметтік нысандарға, Президент саябағы аумағындағы бес және үш жұлдызды қонақүйлерге осы бұйымдар қолданылады.
Облыс әкімдігі өңірдегі инвестициялық жобаларға және компанияға жан-жақты қолдау көрсетуге дайын.
