Қызылордада оқушылар мен студенттер есірткіге қарсы байқау өткізді
ҚЫЗЫЛОРДА. 16 қыркүйек. Қызылордада жергілікті мектеп оқушылары мен студенттер арасында «РЭП – есірткіге қарсы!» ұранымен байқау болып өтті. Бұл туралы Kyzylorda-news.kz ақпарына сүйенген rast.kz хабарлайды.
Оны Қызылорда облысы полиция департаментінің есірткі қылмысына қарсы іс-қимыл басқармасы облыс ұйымдастырды. Сайыстың негізгі мақсаты жастар мен жасөспірімдердің бойында есірткі тарату мен тұтынуға қарсы тұруын дамыту, салауатты және қауіпсіз өмір салтын қалыптастыру, денсаулықты бағалау болып табылды.
Шараға қатысушылар аталмыш тақырып төңірегінде іздену нәтижесінде нашақорлыққа қарсы рэп орындап, есірткі мәселесін кеңінен ашатын өздерінің шығарған композицияларын ұсынды.
Сайысқа қатысқан жазғы демалыс лагерьлерінің барлық сайыскерлері жеңімпаз атанды. Жалағаш ауданындағы №201 мектеп-лицей оқушысы Інжу Нұрат пен Жалағаш ауданындағы №203 орта мектеп оқушысы Мәриям Жақсыбай байқау жүлдегерлері болып танылды.
