Reuters: Путин Трамптың Украинаға қатысты ультиматумын елемейді
УАШИНГТОН. 5 тамыз. Ресей диктаторы Владимир Путин АҚШ президенті Дональд Трапмтың Украинадағы соғысты 8 тамызға дейін тоқтату жөніндегі ультиматумына пысқырмайтын түрі бар. Бұл туралы DW ақпарына сүйенген rast.kz хабарлайды.
«Ресей президенті Владимир Путин АҚШ президенті Дональд Трамптың алдағы жұма күні аяқталатын Украинадағы атысты тоқтату туралы ультиматумын елемейді», деп атап өтті Reuters 5 тамыз, сейсенбі күні Кремльмен байланысы бар үш мәнбеге сілтеме жасап.
«Путин Украинадағы соғыста жеңіске жететініне, ал жаңа санкциялардың ел экономикасына зиянын тигізбейтініне сенімді», деп жазады агенттік. Мәнбелердің бірінің мәліметіне сәйкес, Путиннің қазіргі бар мақсаты Украинаның төрт облысын – Донецкіні, Луганскіні, Запорожье мен Херсонды толық басып алу болып отыр. «Ол содан кейін ғана ол бейбіт келісімге келу мәселесін талқылауға отырады», – деп баяндады Reuters-тің мәнбелері.
«Ресей мен Украина арасында жүріп жатқан келіссөздердің іс жүзінде мағынасы жоқ, ол тек Трампқа Мәскеудің бейбітшілікке қарсы емес екенін білуіне ғана мүмкіндік береді», деп жазады агенттік.
Reuters-тің екі әңгімешісінің айтуларынша, Путин «Трампты ашуландырып алғысы келмейді, сөйтсе де, өзінің Уашингтонмен және Батыспен қарым-қатынасты жақсарту мүмкіндігін жіберіп алуы мүмкін екенін біледі, бірақ оған соғыста табысқа жету мақсаты маңыздырақ болып тұр».
«Ресейдің бас штабы Путинге Украина майданының алдағы екі-үш айдың ішінде құлайтынын айтты», дейді олар.
