USD
СЕМЕЙ. 14 шілде. Семей қаласының маңайындағы бейітке қылмыс әлемінің серкесі Лёха Семипалатинскийге, яғни Айтқали Маймушевке ескерткіш орнатылды. Бұл туралы Orda.kz ақпарына сүйенген rast.kz хабарлайды.
«Абай облысы Семей қаласындағы Знаменка тас жолының бойындағы мұсылман зиратында жұрт арасында «Лёха Семипалатинский» деген атпен танылған Айтқали Маймушевке ескерткіш орнатылды», – деп жазады паблик.
Ол Қазақстанда «заңдағы ұрылардың» бірі ретінде танымал болған.
Оқыс оқиға әлеуметтік желілер мен жергілікті тұрғындар арасында қызу талқыға түсті. Көпшілік Маймушевтің есімін қылмыстық ортамен байланыстырып, мұндай тұлғаға ескерткіш қойылуын сынға алды. Ал Абай облысы әкімдігі әзірге бұл мәселеге қатысты ресми пікір білдіре қойған жоқ.
Құқық қорғау органдарының мәліметінше, Айтқали Маймушев қылмыстық идеологияны насихаттап, ұйымдасқан қылмыстық топтармен байланыс орнатқан. Ол 2024 жылғы 9 қазанда Карелия Республикасындағы Надвоицы елді мекенінде орналасқан қатаң режимдегі ИК-1 колониясында асылған күйде табылған.
Бұған дейін, 2025 жылғы сәуірде «Голова» деген лақап атпен қылмыс әлеміне мәшһүр 60 жастағы тағы бір «заңдағы ұры» Серік Жаманаев Қызылжар қаласында онкологиялық кеселден көз жұмған.
