Қазақстан ресейліктердің елге кіру ережесін қатайтып жатыр
АСТАНА. 19 маусым. Қазақстан Кремльдің жаңа көші-қон талаптарына жауап ретінде Ресей азаматтарының елге кіру шарттарын қатаңдатуды жоспарлап отыр. Бұл туралы Dialog.ua ақпарына сүйенген rast.kz хабарлайды.
Қазақстан Ішкі істер министрі Ержан Сәденов республика шекарасынан өтетін ресейліктерге қатаң бақылау шараларын енгізуге дайын екенін мәлімдеді. Шешім Ресейдегі қазақтар үшін енгізілген шектеулерге жауап болмақ.
Ресейде қабылданған жаңа ережеге сай, алдағы 30 маусымнан бастап визасыз елдердің, оның ішінде Қазақстанның азаматтары да бұл елге кіруге үш күн қалғанда RuID қосымшасында тіркелуі керек. Жеңілдіктер тек жедел емдеу, ауыр сырқаттану немесе туыстарының қайтыс болуы жағдайлары үшін ғана қарастырылған. Бірақ мұндай жағдайларда хабарламаны растайтын құжаттар төрт сағат бұрын берілуі тиіс.
Дегенмен Қазақстан Ішкі істер министрлігі мұндай метаморфозаға үнсіз қарап отыра бере алмайтынын білдірді. «Ресейліктер үшін дәл сондай шектеулер енгізуге біз де дайынбыз», – деді Сәденов.
Dialog.ua паблигінің ақпарынша, соңғы жылдары Мәскеу мен Астана арасындағы қарым-қатынастың салқындағаны байқалады. Бұған басқа нәрселермен қатар, Ресей билігінің қазақ жерін «ежелгі орыс жері» деген негізсіз мәлімдемелері себеп болды.
Қазір Қазақстан көрші елдерге агрессияны күшейтіп отырған Кремль ықпалының орбитасынан шығуға тырысып жатыр.
Жақында Қытайдың төрағасы Щи Жиңпиңнің Астанаға жасаған сапарының қорытындысы осы талпыныстың бекер емес екенін байқатады.
Осыған байланысты әлеуметтік желілерде қызу пікірталастар да жүруде. Оларды пайдаланушылардың көпшілігі соңғы уақыттары Орталық Азия мемлекеттеріне ықылас аударуды күшейтіп, экономикалық байланысты кеңейтуге мән беріп отырған Бейжіңнің әрекеттеріне қолдау білдіріп жатыр.
