USD
КИЕВ. 9 наурыз. Украина Ресеймен жүргізілетін келіссөздегі басты көзірі – Курск облысына егелік ету мүмкіндігінен айырылып қалуға жақын қалды. Бұл туралы CNN ақпарына сүйенген rast.kz хабарлайды.
«Украина үшін Курск аймағындағы жағдай тез нашарлап барады, ал Киев жақын арада болашақ бейбіт келіссөздердегі басты көзірінен айырылып қалуы кәдік», – делінген телеарна хабарламасында.
Басылым авторлары Курскідегі украин әскерлерінің қиын жағдайда екенін айтқан екі жақтың әскери блогерлерінің жарияланымдарына сілтеме жасайды. Түпкі мәтінде Ресей қорғаныс министрлігінің төрт елді мекенді басып алғаны, сондай-ақ ресейдіктердің жұмыс істемей тұрған газ құбыры арқылы жасаған рейдтері жайлы айтылады.
Бұл жолы РФ армиясына Солтүстік Кореяның әскерилері белсенді түрде қолдау көрсетуде.
«Қиын, бірақ біз жұмыс істеп жатырмыз. Корейлердің келуі жалғасуда», – деді украиналық бір сарбаз CNN-ге.
Басылым авторы атап өткендей, егер Ресей Курск облысының аумағын түгелдей қайтарып алса, оның бұл жерден босаған жауынгерлерді Украинаның шығысына жіберуі мүмкін. Украина армиясы қазірдің өзінде Курск облысында өзіне бақылауына алған аумақтың жартысына жуығын беріп қойды.
Кейбір украин блогерлері қазір Ресейдің басымдылығын ескере отырып, Курскіге басып кірудің стратегиялық құндылығы таусылған болуы мүмкін дегенді айтады. CNN украинның әскери блогері Сергей «Флеш» Бескрестновтың айтқан сөздерінен үзінді келтіреді.
«Мен бұлай айтамын деп ешқашан ойлаған емеспін. Бірақ, бәлкім, Курск бағытынан «жиылып-терілетін» уақыт жеткен де шығар. Ол жақтағы жігіттерге қиын. Жау ресурстарына алаңдаушылық туғызу ретінде бұл операция өзін әлдеқашан ақтап алды деп ойлаймын. Бірақ келіссөздердегі саяси көзір ретінде ұсынылатыны енді күмәнді», – деп жазды ол осы аптада Telegram-да.
Еске сала кетейік, өткен аптада Ресей Курск аймағына өзінің ең тиімді ұшқышсыз ұшақтарының бірін, сондай-ақ жүздеген Солтүстік Корея әскерін, теңіз жаяу әскерлері мен десантшыларын жеткізген болатын. Соның нәтижесінде мұнда Украина өзінің көп техникасынан айырылды, логистикалық ахуалы күрделене түсті.
Мұндағы ресейліктердің қатарын жұмыс істемейтін құбырмен келіп, украиндардың ту сыртынан шығатын жүзге жуық арнайы жасақ жауынгерлері толықтыруы керек еді. Бірақ бұл рейд сәтсіз аяқталды, көптеген солдат құбыр ішінде уланып, тұншығып өлсе, одан аман шыққандарын украин сарбаздары түгел жайратып тастады.
