Трамп: Ресей, Украина және АҚШ арасында келіссөздер басталды
УАШИНГТОН. 14 ақпан. АҚШ президенті Дональд Трамп күні бүгін Ресей, Украина және АҚШ арасында келіссөздер басталғанын жариялады. Бұл туралы The Moscow News ақпарына сүйенген rast.kz хабарлайды.
Ақ үйдің қожайыны АҚШ-тың жоғары лауазымды шенеуніктері жақын арада Ресей және Украина шенеуніктерімен соғысты тоқтату әрекеттері аясында екі кездесу өткізбекші деп мәлімдеді. «Ертең [14 ақпанда] Мюнхенде (Мюнхен қауіпсіздік конференциясында – TMT) кездесу болады, ал келесі аптада Сауд Арабиясында менімен немесе [Ресей президенті Владимир] Путинмен емес, жоғары лауазымды тұлғалар арасында кездесу өтеді. «Және оған Украина да қатысады», – деді Трамп Ақ үйде журналистерге бұл байланыстардың қандай форматта болуы мүмкін екенін көрсетпестен.
Ал Мюнхен конференциясының ресми бағдарламасында Трамп жариялаған кездесу атап көрсетілмеген. Ресей шенеуніктері бұл шараға Украинада жаппай соғыс басталған 2022 жылдан бері қатыспайды. Украина президентінің кеңесшісі Дмитрий Литвин украин делегациясы Мюнхенде ресейліктермен кездеспейтінін, ондай жоспардың жоқ екенін мәлімдеді. «Украина алдымен Америкамен сөйлесуі керек. Еуропа нақты және тұрақты бейбітшілік үшін кез келген маңызды әңгімеге қатысушы болуы керек. Ал ресейліктермен талқылау үшін бізде келісілген ортақ ұстаным ғана болуы керек. «Сіз орыстарды бос үстелде кездестірмейсіз», – деді Литвин.
Мюнхен конференциясы 14-16 ақпан аралығында өтеді. Шара аясында Украина президенті Володимир Зеленьский, АҚШ вице-президенті Дж. Д.Вэнс және АҚШ Мемлекеттік хатшысы Марко Рубио кездеседі деп күтілуде.
Трамп бұған дейін 12 ақпанда РФ диктаторы Владимир Путинмен алғаш рет телефон арқылы ресми сөйлескен. Онда Путинмен жеке кездесуі өтуі мүмкін ел ретінде Сауд Арабиясын атаған болатын.
Бұл оқиғаға Кремль айран-асыр қуанып жатыр. Ондағылар мұны басқыншы елдің дипломатиядағы қазіргі таңдағы ең ірі жеңісі ретінде бағалауда. Осының қызуымен Путин тіпті Трампты және АҚШ-тың жоғары лауазымды тұлғаларын Мәскеуге қонаққа шақырып та үлгерді.
Осыдан кейін Ресей әкімшілігі АҚШ-пен диалогжүргізу үшін келіссөз тобын құруды бастағанын хабарлады, бірақ оның құрамына кім кіретіні әзірге белгісіз. Ал Трамп америкалық команда мүшелерінің қатарына мемлекеттік хатшы Марко Рубио, ЦРУ директоры Джон Рэтклифф, Ұлттық қауіпсіздік жөніндегі кеңесші Майк Уолц және Таяу Шығыс бойынша арнайы елші Стив Виткофф енетінін атады.
