USD
ҚОСТАНАЙ. 19 желтоқсан. Қостанай қаласында қайтыс болған әйелдің қыздары жедел жәрдем фельдшерін жабылып ұрған. Бұл туралы Alau.kz ақпарына сүйенген rast.kz хабарлайды.
Фельдшер Әнел Баймурзинаның айтуынша, сол күні ол түнгі ауысымға түсіп, шақырту алған жерген барған.
Оқиға 17 желтоқсан күні түнде орын алған. Шамамен түнгі сағат 23-те 103 басқару жүйесіне бір әйелдің ауа жетпей талықсып жатқаны жайлы дабыл түседі. Облыстық жедел жәрдем станциясындағылар осыдан соң бригаданың 4 минут өткенде, науқас жатқан пәтерге жеткенін айтады.
Фельдшер барған бойда өзінің жұмысын атқаруға кіріседі. Байқаса, сол кезде пациенттің тыныс алуы мен жүрек соғысы тоқтап қалған екен. Сосын бригада мүшелері сырқатқа жансақтау шараларын қолдана бастайды. Атап айтқанда, қолдап басып, жүрек соғысые қалпына келтіруге әрекет етеді. Бірақ одан ештеңе шықпайды. Дәрігерлер сосын 30 минуттың тірліктен кейін науқастың қайтыс болғанын тіркейді.
«Біз сол бойда отбасы мүшелеріне көңіл айттық. Ал олар маған ұмтылып, қолмен ұрып, аяқпен тепкілеп, жабылып сабай бастады. Екінші фельдшер мен жүргізуші мені олардан қорғамақ болып еді, бірақ аналар күштірек әрі екпінділеу болып шықты. Менің айқайымнан кейін жүргізуші қарсы пәтерге барып, полиция шақыртуға өтініш жасады. Содан кейін көршінің өзі келіп, мені бұл әйелдердің тепкісінен құтқарып қалды», – дейді фельдшер.
Оның айтуынша, миы шайқатылған, самай тұсы қанталаған, беті жырылып кеткен. Ол ауруханаға жатқызылған.
Қостанай облыстық полиция департаменті баспасөз қызметінің мәліметінше, аталған факт бойынша қылмыстық іс қозғалған. «Алғашқы медициналық көмек көрсету барысында 41 және 51 жастағы екі әйелдің фельдшерді ұрып-соғып, дене жарақаттарын салғаны анықталды», – деп хабарлады ведомство.
Осы оқиғаға байланысты сот-медициналық сараптамасы тағайындалды.
Облыстық жедел жәрдем станцияның бас дәрігері Давид Саркисян мұндай инциденттердің жұмыс барысында кездесетінін, бірақ олардың дәрігерлер тарапына шағым айтумен шектелетінін, ал мынадай соққыға жығу дерегінің жиі болмайтынын атап өтті.
«2025 жылы әрбір жедел жәрдем бригадасына полицейлердегі сияқты аудио және видео жазба жазып тұратын жетон беріледі. Ол шақыруға барған жерде бірден іске қосылады. Мен осыдан кейін көп нәрсе оңынан шешіледі ғой деп ойлаймын», – деді бас дәрігер.
