Украина әскерлері Сейм өзеніндегі екінші маңызды көпірді де жойып жіберді

КИЕВ. 18 тамыз. Украина Қарулы күштері Курск облысының Званное селосы тұснындағы екінші көпірді де талқандап тастады. Бұл туралы DonPress ақпарына сүйенген rast.kz хабарлайды.

Бүгін, 18 тамыз күні Украина Әуе күштерінің қолбасшысы, генерал-лейтенант Микола Олещук Курск облысының Глушков ауданы жерінен ағып өтетін Сейм өзенінің Званное селосы тұсындағы екінші маңызды көпірінің күлі көкке ұшқанын растап берді. Ол мұны өзінің телеграм-арнасында жазып, көпірдің жарылып жатқаны түсірілген видеоны қоса жариялады.

Сенбі, 17 тамыз күні кешқұрым Украина Қарулы күштерінің Курск облысындағы тағы бір маңызды көпірді қиратқаны хақында ақпар тараған еді. Ресей Z-әскери тілшілерінің айтуларынша, оқиға Глушков ауданына қарасты Званное селосында орын алған.

Көпір осы жерден ағып өтетін Сейм өзенінің үстіне салынған. «Енді тек бұл жерлерден жаяу немесе шағын жеңіл көліктермен кешіп өтуге болады», – дейді жергілікті тұрғындар.

Ресейліктер жағы: «Курск облысының шекара аумағын оқшауландыру барынша айқынырақ әрі қарқынды жүріп жатыр», – деп назалануда.

17 тамыз күні таңертең Ресей әскери тілшілері Сейм өзені өтетін аумақтағы үш көпір белгіленген картаны жариялады. Қазір олардың екеуінің күлі көкке ұшты, тек Карыж селосы маңындағы өткел ғана аман тұр.

Ресей бұқаралық ақпарат құралдары осыған орай Украина Қарулы күштері көпірлерді қирату арқылы Курск облысындағы ұрыс қимылдары ауданын тағы 1,5 есеге арттыруды көздеп отырғанын жазып жатыр.

Тәулік ішінде украиндар облыстағы маңызды учаске – Кореново селосын басып алды. Ол шекарадан 25 шақырым жерде тұр.

Украина әскерлері Ресейдің 810-шы жеке теңіз жаяу әскерлері бригадасы ротасының аман қалған солдаттарын тым-тырақай жан-жаққа қашуға мәжбүр етіп, олардың командирлерін қолға түсірді.

Өткен тәулікте Украина армиясы 1 170 оккупант пен олардың 200-ден аса техникасын жойып жіберді.