Килиан Мбаппенің 17 жасар інісі «Лилль» клубымен келісімшарт жасасты
ПАРИЖ. 4 шілде. Аты әлемге танымал футболшы Килиан Мбаппенің інісі Этан Мбаппе «Лилль» командасының құрамына қабылданды. Бұл туралы «Советский спорт» ақпарына сүйенген rast.kz хабарлайды.
Француздың «Лилль» клубы Мадридтің «Реалы» мен Франция құрамасының форварды Килиан Мбаппенің інісі Этан Мбаппемен келісімшарт жасасқанын жария етті.
Команданың 17 жасар жартылай қорғаушымен келісімі 2027 жылдың жазына дейін жасалған.
«Мен «Лилльдің» қатарына қосылғаныма өте қуаныштымын. Енді клуб сапында алаңға шығуға және ойыншылармен, персоналмен және жанкүйерлермен танысатын сәтті асыға күтіп жүрмін. Мен «Лилль» жобасы өзім үшін өте сәтті қадам деп есептеймін. Бұл команда Франциядағы үздіктердің қатарынан табылады», – деп, кіші Мбаппенің сөзінен дәйектеме келтірді клуб баспасөз қызметі.
Француз клубтары тарапынан Килиан Мбаппенің інісіне деген қызығушылық таныту 2021 жылдың жазында-ақ басталған. Сол жылы «Пари Сен-Жермен» 14 жасар футболшы балаға келісімшарт ұсынған болатын. 2023/2024 жылғы маусымда жас футболшы француз клубының жастар құрамында 22 ойынға шықты. Онда бес гол соғып, үш нәтижелі пас берді.
Этан Мбаппе ПСЖ-ның негізгі құрамында 3 матч ойнап үлгерді. Жас футболшы дәл ағасы Килиан секілді жылдам жүгіре алмайды, бірақ дене күші қуаты жағынан оған қатты ұқсайды, алаңда позицияны жақсы таңдай біледі, тактикалық жағынан сауатты екенін де танытты.
