Маңғыстау облысының әкімі Нұрлан Ноғаев қызметінен босатылды
АСТАНА. 16 мамыр. Мемлекет басшысының Жарлығымен Нұрлан Ноғаев Маңғыстау облысының әкімі лауазымынан босатылды. Бұл туралы kazinform.kz ақпарына сүйенген rast.kz хабарлайды.
Әзірге оның не үшін қызметтен кеткені айтылып отырған жоқ. Бірақ бұдан бірер күн бұрын осындай қауесет тарады.
Ноғаев Нұрлан Асқарұлы 1967 жылы 30 шілдеде Ақтөбе облысы, Мұғалжар ауданы, Қандыағаш қаласында туған. 1993 жылы И. Губкин атындағы Мәскеу мемлекеттік мұнай және газ академиясын тау-кен инжинері мамандығы бойынша бітірген. 1999 жылы Қазақ мемлекеттік басқару академиясын «халықаралық экономикалық қатынастар» мамандығы бойынша және 2006 жылы РФ СІМ Мәскеу мемлекеттік халықаралық қатынастар институтын (Университет) іскерлік әкімшілік магистрін тәмамдаған.
Еңбек жолын Ақтөбе облысындағы Қандыағаш станциясында электромонтер болып бастаған.
Мәскеу қаласында мұнай өнімдері жөніндегі аға сарапшы, «Гили-Паскер» ЖШС-нің бөлім бастығы (1993-1995). Алматы қаласында «Отырар Лтд» шағын кәсіпорны бас директорының орынбасары (1995-1996). 1996-2006 жылдары аралығында маркетинг жөніндегі инженер, «Қазақтүрікмұнай» ЖШС-нің маркетингі, мұнай және мұнай өнімдерін сату бөлімінің бастығы, бас директоры қызметтерін атқарған.
2006 жылғы ақпан-тамыз аралығында «ҚазМұнайГаз «Ұлттық компаниясы» АҚ-ның атқарушы директоры болды. 2006 жылдың тамызынан бастап Қазақстан Республикасы Энергетика және минералдық ресурстар министрлігінің мұнай өнеркәсібі департаментінің директоры болып жұмыс істеді.
2007 жылдың қыркүйегінен бастап Батыс Қазақстан облысы әкімінің экономика, қаржы және мұнай-газ секторы мәселелеріне жетекшілік ететін орынбасары болды.
2012 жылдың 20 қаңтарында Батыс Қазақстан облысының әкімі болып тағайындалды. 2016-2019 жылдары аралығында Атырау облысының әкімі, 2019 жылғы 18 желтоқсанyfy 2021 жылғы 7 қыркүйекке дейін Энергетика министрі болып қызмет атқарды.
2021 жылдың 7 қыркүйегінде Қазақстан Республикасы Президентінің Жарлығымен Маңғыстау облысының әкімі болып тағайындалды.
