USD
АСТАНА. 25 ақпан. Белгілі саясаткер Мұхтар Тайжан сотталушы Қуандық Бишімбаевтың әкесін барлық атақ-марапатынан айыруды ұсынды. Бұл туралы «Адырна» ақпарына сүйенген rast.kz хабарлайды.
Саясаткер әйелін өлтірді деп айыпталып отырған экс-министр Қуандық Бишімбаев әкесі – Уәлихан Бишімбаевтың көмегінің арқасында жазадан құтылып кетуі мүмкін екенін алға тартады.
22 ақпанда Бишімбаевтың адвокаттары журналистерге берген сұхбаттарында оның кісі өлтірмегенін, өз кінәсін мойындамайтынын айтып отырғанын жеткізген.
Осы мәселеге қатысты саясаткер Мұхтар Тайжан «адвокаттармен сұхбат – Қуандық Бишімбаевтың атын ағарту үшін жасалған үлкен науқанның бір бөлігі ғана» деп есептейтінін мәлімдеді. Ол бұл істің бастамашысы ықпалды депутат, академик және күдіктінің әкесі Уәлихан Бишімбаевтың өзі екеніне сенімді.
«Мен кісі өлтірушілердің өмірін сақтап қалған дәрігерлерді кінәламаймын. Бұл олардың кәсібі, міндеті және анты. Олар кез келген адамды емдеуге және құтқаруға міндетті. Мен сондай-ақ кісі өлтірушілерді қорғайтын адвокаттарды да кінәламаймын. Бұл да олардың кәсібі, міндеті, анты. Олар әрбір адамды қорғауға міндетті. Бірақ мен Бишімбаевтың әкесі, академик, лауреат, еңбек сіңірген қайраткер, ректор және «Нұр-Отанның» депутаты, Назарбаевтың досы Уәлихан Бишімбаевты кінәлаймын. Ол мемлекет (халық) қаржысын тонаушы ұрыны тәрбиелеп, өсірді. Мұны сот дәлелдеп отыр. Сонымен қатар ол Назарбаевтың ұлына мерзімінен бұрын кешірім жасауына қол жеткізгеніне сенімдімін. Сондықтан қылмыскер бостандыққа шығып, өзінің жазаланбайтынына сенімді болды. Ал бұл жағдай үлкен трагедияға әкелді», – деді Мұхтар Тайжан.
«Қазір кіші Бишімбаев әйелі Салтанат Нүкенованы ерекше қатыгездікпен өлтірді деген күдікке ілінді. Енді, міне, БАҚ арқылы ол ұлын ақтау науқанын ұйымдастырып отырған әке екеніне тағы да сенімдімін. Баласының әрекетіне өкінгені туралы сөз жоқ. Егер сот Қуандықтың кінәсін дәлелдесе, онда әкесін барлық құрметі мен атақ-марапатынан айыруды талап ету керек. Оның тәрбиесі жазықсыз адамның өліміне әкелді. Ол салтанат пен құрметке емес, ол сөгіс пен ұятқа лайық. Бұл барлық жемқор ата-аналарға сабақ болады», – деді саясаткер бұдан әрі өз ойын жалғастырып.
