Президент баспасөз қызметкерлерін Ұлттық баcылым күнімен құттықтады
АСТАНА. 2 ақпан. Президент Қасым-Жомарт Тоқаев мағбұғат қызметкерлерін Ұлттық баспасөз күнімен құттықтады. Бұл туралы Ақорда баспасөз қызметінің дерегіне сүйенген rast.kz хабарлайды.
Мемлекет басшысының құттықтауында былай делінген:
«Құрметті баспасөз қызметкерлері!
Баршаңызды Ұлттық басылым күнімен шын жүректен құттықтаймын!
Сонау 1913 жылы, дәл осы күні еліміздің баспасөз саласының бастауында тұрған «Қазақ» газетінің алғашқы саны жарық көрді. Халқымыздың біртуар перзенттері – Алаш арыстары шығарған бұл басылым сындарлы сәттерде ұлтты ұйыстыруға айрықша ықпал етті.
Сөз бостандығына адалдығынан айнымаған басылымдар әрдайым шынайы ақпараттың және сапалы сараптаманың қайнар көзі болып қала береді. Газет-журналдар замана тынысын дөп басып, мемлекет пен қоғамдағы қордаланған мәселелерді көтереді, түрлі көзқарастағы ой-пікірлерді жарыққа шығарады. Сондай-ақ жалпы адамзатқа ортақ ізгі құндылықтарды дәріптейді.
Баспасөз қызметкерлері кәсіби біліктіліктің, отаншылдық пен жауапкершіліктің озық үлгісін көрсетіп келеді.
Біздің басылымдарымыз халықтың бірлігін нығайтуға атсалысып, Әділетті Қазақстанды құру ісіне елеулі үлес қоса береді деп сенемін.
Сіздерге зор денсаулық, бақ-береке және шығармашылық шабыт тілеймін!»
