«Соловьев аузынан улы жынын оңды-солды шашып келеді» (видео)

АСТАНА. 24 қараша. Қазақстан Парламенті сенатының депутаты, халықаралық қатынастар, қорғаныс және қауіпсіздік комитетінің төрағасы Мұхтар Құл-Мұхаммед ресейлік Владимир Соловьевтің бағдарлармасында Қазақстан тарапына айтылған қоқан-лоқыға орай өз ойын білдірді. Бұл туралы «Азаттық» радиосы хабарлады.

«Соловьев баяғыдан бері көптеген елдерде нон грата тұлғаға айналған және қазір мүмкін болған санкциялар қара тізімдерінің бәрінің көшін бастап келеді, – деді Мұхтар Құл-Мұхаммед 23 қараша күні. – Ол ызалы кекпен жұрттың бәріне жаппай тап беріп, аузынан улы сілекейін шашады да отырады».

Депутат Соловьевтің бұдан бұрын ресейлік «Россия 1» мемлекеттік арнасының эфирінен америкалық биологиялық зертхана орналасқан-мыс деген желеуді алға тартып, Алматыға соққы беруді ұсынғанын еске түсіре кетті. Құл-Мұхаммедтің пайымынша, мұндай жанжалды мәлімдемелерді Соловьевтің өзі жасап, оларға өз бағдарламасының қонақтарын арандатып салып отырады. Сенатор өз сөзінде Соловьевтің бағдарламасына шақырылған Кремль сарапшысы Дмитрий Дробницкий айтқан Ресейдің Украинадан кейінгі «келесі проблемасы» Қазақстан болуы мүмкін екені, өйткені, мұнда да «нацистік үдерістердің» басталып кетуі ықтимал екені жайындағы мәлімдемеге де тоқталды. Ол ресейлік сарапшы сөзінде Қазақтан мәнзіліне «тікелей қоқан-лоқы көрсету» бар екенін атап өтті.

«Татымсыз сарапшы-фантаст Дробницкийдің, – ол Жуков болып та аталады, – пікіріне назар аудармауға да болар еді, егер бұл сөз бізбен бір Еуразия экономикалық одағы мен ҰҚКҰ-да есепте тұратын өзімізге достық сыңайдағы елдің мемлекеттік арнасынан айтылмаған болса. Ресей саясаткерлерінің мұндай белгілі бір мақсаттарды көздейтін жаулық әрекеттері Соловьев шоуының баяғыдан бері жүйелі сипаты болып келеді, олай болса, бұл Ресейдің федералды билігі тарапынан, сөз жоқ, өзінің лайықты бағасын алуға тиіс. Қазақстан 30 жылдан астам уақыттан бері тәуеліз мемлекет болып табылады. Енді Соловьев пен оның осындай саясатшысымақтары көзге көрініп тұрған ақиқатты түсініп, жаңа геосаяси шындықпен санасуды үйренулері керек», – деп түйіндеді Мұхтар Абрарұлы.

Осы күні Қазақстан Сыртқы істер министрінің орынбасары Роман Василенко да Соловьев бағдарламасында қозғалған ойларға қатысты түсіндірме жасады. «Біз мұны, біріншіден, Ресей Федерациясының ресми позициясы деп есептемейміз, екіншіден, бұл Қазақстан мен Ресей арасындағы дәстүрлі тығыз қарым-қатынасқа залал келтіреді, үшіншіден, мұндай мәлімдеменің федералды арналардың бірінде айтылуы Ресей Федерациясының билігі тарапынан өзінің тиісті реакциясын алуға тиіс», – деді ол.

Ал Ресей президентінің баспасөз хатшысы Дмитрий Песков болса, Соловьевтің бағдарламасында айтылған мәлімдемелер Кремльдің позициясын білдірмейтінін айтып қана құтылды.