Северодонецкіде бір аптада 28 қадыровшы жойылды – журналист

КИЕВ. 20 маусым. Луганск облысындағы Северодонецк қаласында соңғы аптада 28 қадыровшы оққа ұшты. Бұл туралы Obozrevatel хабарлады.

Жексенбі, 19 маусым күнінің кешінде журналист Роман Цимбалюк осындай мәлімет таратты.

«Северодонецк үшін болған тек өткен аптадағы (13-19 маусым) ұрыстар кезінде «Ахмат» (Шешенстан Республикасы) жасағының 28 әскери қызметкері жойылды. Жараланғандар саны кемінде 47-ге жетті», – делінген хабарламада.

Роман Цимбалюк Facebook-тегі парақшасында Северодонецкіні басып алмақ болып жүріп, өздері жаһаннамға кетіп қалған кадыровшылардың аты-жөндерін де атап көрсетті. Олар:

Долдаев Махмуд, Мусаев Мовла, Бакмурзаев Ховажи, Иблиев Магомед, Джабраилов Малик, Любхан Зайнул, Яндиев Аслан және басқалар.

Журналист кадыровшылардың ешқашан майданның алдыңғы шебінде украиндармен бетпе-бет соғысып көрмегенін, кілең артта, тылда жүретіндерін, соған қарамастан, ылғи қырғын шығынға ұшырап жатқандарын айрықша атап көрсетті.

«Атап өту керек, «Ахмат» жасағы тікелей ұрыс қимылдарына араласпайды, олар басқыншылар басып алған жерлердегі көшелер мен үйлерді тазалауға ғана қатысады», – деп жазды Цимбалюк.