Қазақстан футзалшылары бүгін жартылай финалда ойнайды
ВИЛЬНЮС. 30 қыркүйек. Бүгін түнде футзалдан Қазақстан құрамасы Литвада өтіп жатқан әлем чемпионатының жартылай финалында Португалия командасымен кездеседі. Бұл туралы rast.kz хабарлады.
Қазақстан құрамасы бірінші рет жаһандық жарыстың жартылай финалына шығып отыр. Ал бүгін қарсыласын ұтып, финалға жолдама алатын болса, ол нағыз зор табыс болар еді.
Негізі, ондай жетістікке жетуге толық мүмкіндік бар. Бұл қарсыластар бұған дейін бір рет, 2015 жылы Еуропа чемпионатының іріктеу турнирінде кездескен. Сол жолы біздің жерлестеріміз қарсыластарын 3:1 есебімен жеңіп кеткен. Ал 2016 жылы Қазақстан құрамасы континент чемпионатының қола жүлдесіне қол жеткізді.
Ал Португалия құрамасы құрлық біріншіліктерінде табысты өнер көрсетіп келеді. Ол 2008 жылы финалға шығып, Испаниядан жеңіліс тапты. 2010 жылы финалда тағы Испаниямен ұшырасып, жеңіске жетті. Демек, Еуропаның чемпионы және күміс жүлдегері деген атақтары бар.
Қазақстан құрамасы осы жолғы біріншіліктің плей-офф кезеңінде, 1/8 финалда Таиландты 7:0, ал 1/4 финалда Иранды 3:2 етіп ұтып, жартылай финалға шыққан болатын.
Португалиялықтар плей-оффтың екі кездесуінде де овертаймда ұтысқа жетті. Ол 1/8 финалда Сербияны 4:3 етіп жеңсе, 1/4 финалда Испанияны 4:2 етіп тізе бүктірді.
Қазақстан ширек финалда Иранды жеңгеннен кейін УЕФА-ның рейтингісінде 2147 ұпаймен үшінші сатыға көтерілді. Португалия 2121 ұпаймен төртінші орында тұр. Бұлардың алдында Испания (2254) мен Ресей (2164) келеді.
Португалия – Қазақстан матчы Астана уақыты бойынша сағат 23:00-де басталады. Ойын «Қазспорт» телеарнасынан тікелей эфирде көрсетіледі.
