Өзбекстан шекарасындағы екі ауыл Қазақстан құрамына кірді
ТАШКЕНТ. 29 мамыр. Қазақстан-Өзбекстан шекарасында орналасқан екі ауыл ресми түрде Түркістан облысының территориясына енгізілді. Бұл туралы Central.uz хабарлады.
«Қазақстан-Өзбекстан шекарасындағы Бағыс және Хиёбон елді мекендері Түркістан облысының территориясына ресми түрде енгізілді», – делінген хабарламада.
Тиісті құжат 25 мамыр күні Қазақстан премьер-министрінің сайтына орналасқан. Үкімет қаулысында Бағыс және Хиябан ауылдарының жалпы ауданы 795,65 га жерді құрайтыны атап көрсетілген. Аталмыш шешім ресми жарияланған күнінен бастап күшіне енеді.
Жаңа елді мекендердің қосылуына байланысты Түркістан облысының шекарасына өзгеріс енгізілді.
Бағыс ауылы Шымкент қаласынан 150 шақырым қашықтыққа орналасқан. Онда 1200 адам тұрады. Ауыл тұрғындары 2001 жылы «тәуелсіз республика құру» туралы мәлімдемелері арқылы көпшілікке мәлім болған. Себебі, олар сол сәтте өздерінің Қазақстан мен Өзбекстан елдерінің қайсысына қарайтындарын білмеген. Кеңес кезеңінде мұнда Орта Азия әскери округіне қарайтын көкөніс-бақша совхозы орналасқан. Кеңес Одағы ыдырығаннан кейін елді мекен ешкімге керек болмай қалған. Ал ауылдарда негізінен қазақ ұлтты тұрғындар тұрып келген. Екі ортада әрі-сәрі болып қалған олар сол сәтте осылайша екі елдің басшыларын келіссөз үстеліне отыруға мәжбүр еткен. Нәтижесінде ауыл 2003 жылы Қазақстанға өткен. Алайда, елді мекен сол қалпы Қазақстан картасына кірмей қалыпты.
Өзбек тарапы шекаралық келісімнің бүге-шігесін айтып отырған жоқ.
Үстіміздегі жылғы наурыз айында Бағыс тұрғындары тағы да өздерінің наразылықтарын білдірді. 16 наурызда ауылға Қазақстан Үкіметінің арнайы комиссиясы келді. Арада екі апта өткенде, Сарыағаш аудандық әкімдігі мен мәслихаты Бағыс ауылын – Ақжар ауылдық округінің, ал Хиябон ауылын Құркелес ауылдық округінің құрамына енгізу туралы шешім шығарды. Осыған байланысты Түркістан облыстық әкімдігі Үкіметке тиісті құжаттарды жөнелтті.
